Në zemër të qytetit të Memaliajt ka marrë jetë një projekt i ri kulturor, Muzeu Etnografik, një nismë që synon të ruajë dhe promovojë trashëgiminë kulturore të kësaj treve.
Ky muze përfaqëson një pasuri të çmuar historike dhe shpirtërore për zonën.
Hapësira e muzeut përmbledh një koleksion të larmishëm me 11 veshje tradicionale që përfaqësojnë të gjitha njësitë administrative të Memaliajt, duke e bërë atë unik në llojin e vet.
Krahas tyre, vizitorët mund të shohin vegla të vjetra pune, objekte artizanale dhe stoli të punuara me dorë, që dëshmojnë për mënyrën e jetesës dhe mjeshtërinë popullore ndër breza.
Kryetari i Bashkisë, Albert Malaj, thekson rëndësinë që ka ky projekt për identitetin e qytetit: “Brenda pak muajsh kemi hapur dy muze në Memaliaj. Pas muzeut të minierës, ky i fundit është një dëshmi e gjallë e trashëgimisë sonë kulturore.”
Një tjetër risi që pritet së shpejti është ekspozimi i veshjes autentike të heroit lokal Tafil Buzi, i cili në shekullin XIX udhëhoqi rezistencën kundër Perandorisë Osmane.
Përmes këtyre iniciativave, Memaliaj synon të tërheqë gjithnjë e më shumë vizitorë, duke ofruar një përvojë që kombinon natyrën, historinë dhe traditën vendase.
