Çekia shënoi një shifër rekorde sa i përket të infektuarve me covid-19, brenda 24 orëve u regjistruan 9,721 raste të reja.
Sipas autoriteteve shëndetësore të vendit brenda të njejtës periudhe 24 pacientë kanë humbur betejën me virusin duke rritur numrin e përgjithshëm të viktimave në 1.230.
Deri më tani në vendin me 10.7 milionë banorë janë infektuar 149,010 persona, 50.000 prej tyre vetëm javën e kaluar.
Për të përballuar fluksin e pacientëve me koronavirus nëpër spitale autoritetet shëndetësore kanë vendosur shtyrjen e operacioneve jo të domosdoshme.
Qeveria çeke ka paralajmëruar se deri në fund të tetorit sistemi shëndetësor mund të përballet me kolaps.
Ushtria e vendit është vendosur në gatishmëri. Në fundjavë ajo do të nisë ndërtimin e një spitali në Pragë, për 500 pacientë. Ndërsa po ashtu mendohet të veprohet dhe për qytetin e dytë më të madh të Çekisë, Bërno.
Qeveria po ashtu është duke negociuar me Gjermaninë fqinje dhe disa vende të tjera për trajtimin e shtetësave të saj , nëse sistemi i tyre shëndetësor e ka të pamundur të përballojë fluksin.
Sipas Qendrës Evropiane për Parandalimin dhe Kontrollin e Sëmundjeve, Republika Çeke ka aktualisht shkallën më të rëndë të infektimit në Evropë, me 660 të infektuar në 100,000 banorë, gjatë 14 ditëve të fundit.
/GazetaReforma.com/
