Ditën e sotme mes Shqipërisë e Kosovës janë nënshkruar tre marrëveshje të reja në fushën e politikës së jashtme dhe integrimin europian.
Lajmin e ka bërë me dije ministri në detyrë për Europën dhe Punët e Jashtme, Gent Cakaj, i cili me anë të një statusi në Facebook, thekson se këto marrëveshje janë shumë të rëndësishme.
Së pari, me ministrin e Integrimit Europian, Blerim Reka, është mbyllur marrëveshja për të shkëmbyer përvojat dhe ekspertizën në çështje të organizimit të strukturave përgjegjëse për integrim, procesit të përafrimit të legjislacionit dhe bashkëpunim më të përgjithshëm politik në kuadër të synimit për anëtarësim në Bashkimin Evropian.
Së dyti, ministri njofton se me ministrin e Punëve të Jashtme dhe Diasporës, Glauk Konjufca, është nënshkruar marrëveshja për fuqizimin e diplomacisë publike, mes të tjerash, duke përcaktuar një listë konkrete të aktiviteteve për promovimin e imazhit dhe prodhimeve të dy vendeve, si dhe unifikimin e kalendarit të aktiviteteve kulturore.
Gjithashtu, është nënshkruar edhe marrëveshja për punën e bashkërenduar në fushën e politikës së jashtme, që përmban edhe krijimin e një skuadre me përfaqësues specialë për mbrojtjen e interesave të dy vendeve.
Për më tepër, kryediplomati Cakaj, bëri me dije se nëpërmjet një letre zyrtare, i ka kërkuar pëlqimin ministrit Konjufca për të vazhduar projektin e zhvillimit të Ambasadave dhe Konsulatave me hapësira të përbashkëta.
https://www.facebook.com/2297677960501832/posts/2602420406694251/
