Shpesh herë Gazeta Reforma ka denoncuar raste të ndërtimeve pa leje në vend dhe përsëri në shumicën e rasteve nuk është marrë asnjë masë dhe pronarët që kanë lidhje me politikën, kanë vijuar të qetë ndërtimin e tyre, ndonëse pa leje.
Mirëpo Bojken Lako i cili po vendos 4 dritare në një ndërtesë me qira që do ta kthejë në studio muzikore pritet të përballet me burgun. Gjyqtari i Gjykatës së Tiranës, Besnik Hoxha e ka dënuar me 3 vjet burgim për kryerjen e veprës penale të “Ndërtimit të paligjshëm“ për qëllime fitimi.
Në fund, me aplikim të gjykimit të shkurtuar dhe të pezullimit të dënimit, këngëtari është dënuar me 3 vite shërbim prove. Po ashtu, ka marrë një gjobë prej 500 mijë lekësh (të vjetra) nga IKMT.
Boiken Lako ka deklaruar se punimet po kryheshin për llogari të tij në godinë, të cilën e ka marrë me qera duke dashur ta sistemojë me qëllim ta kthente në një studio muzikore. Ka shkuar tek Njësia Administrative Nr.7 dhe ka aplikuar më 21 Janar 2021. Pasi ka dalë leja, ka kontaktuar me një mikun e tij për të ndjekur punimet pasi ai vetë ishte i zënë.
Sipas IKMT-së, leja e marrë nuk parashikonte punimet që po kryheshin. Sipas shkresës nga IMT-ja Bashkia Tiranë, thuhet në vendimin e gjykatës, inspektorët kanë konstatuar se po bëheshin punime pa dokumentacion në objekt, që konsiston në hapjen e katër dritareve në njërën faqe të objektit, me përmasa 75x140cm dhe 120x140cm, në katin e dytë të ndërtesës. Ndaj Lakos është mbajtur process-verbal i konstatimit të kundravajtjes më 17 Shkurt 2021, ndërsa më 26 Shkurt është dënuar me 50 000 lekë gjobë.
Bën mirë që IKMT të mos bëjë dallime dhe të dënojë siç duhet të gjithë ata që bëjnë ndërtime pa leje dhe të mos i shoh si ca të nënës e ca të njerkës.
