Në ditën e prezantimit të Olta Xhaçkës në postin e ministres së Jashtme, ish-ministri Ditmir Bushati ka shpërndarë një artikull me titull “Le të jemi seriozë!”
Ish-kreu i diplomacisë pasi bën një bilanc të negociatave me Greqinë, të drejtuara prej tij, kërkon të analizohet dekreti i Greqisë për zgjerimin me 12 milje.
Bushati i kujton Xhaçkës se duhet të merret me dekretin e Greqisë për zgjerimin e kufirit detar. “Palët i paraprijnë këtij procesi duke fortifikuar pozicionin e tyre ligjor që i ndihmon ato në ballafaqimin gjyqësor me të drejtën ndërkombëtare. Në dritën e këtij zhvillimi duhet lexuar edhe Dekreti nr. 107, i datës 25 Dhjetor 2020 i Presidentes Greke “Për mbylljen e gjireve dhe ndërtimin e vijës së drejtë bazë në zonën detare të ishujve Jon deri në Peloponez”. Shpreh bindjen se institucionet e shtetit shqiptar duhet ta kenë analizuar përmbajtjen e dekretit dhe verifikuar koordinatat detare, për t’u siguruar se një akt i tillë është në përputhje me të drejtën ndërkombëtare dhe nuk cenon sigurinë tonë kombëtare”.
Ai vëren se (pas largimit të tij nga Ministria e Jashtme) pozicioni i Shqipërisë si palë negociuese me Greqinë është dobësuar.
“I dhimbshëm është fakti se pavarësisht përpjekjeve disavjeçare që çështja e delimitimit të hapësirës detare të mbetej në nivel dypalësh, për herë të parë, mënyra e zgjidhjes së kësaj çështje dypalëshe përfshihet në projekt dokumentin e Kuadrit Negociues që do të udhëheq procesin e bisedimeve të anëtarësimit të Shqipërisë në Bashkimin Europian. Megjithëse BE-ja ka në gjirin e saj shtete anëtare, të cilat ende nuk kanë gjetur rrugën e zgjidhjes me njëra-tjetrën për çështjet e delimitimit të hapësirave detare, për shkak të mungesës së një standardi europian, insistimi i Greqisë për ta bërë këtë çështje dypalëshe, që zgjidhet vetëm përmes të drejtës ndërkombëtare, pjesë të agjendës europiane, shton në mënyrë të padrejtë presionin ndaj nesh”, deklaron Bushati.
Më tej ai ofron ekspertizën që ka lënë për këtë çështje, e cila duhet shfrytëzuar para vajtjes në Gjykatën e Hagës.
“Përgjatë këtij procesi disavjeçar që përfshin institucionet kryesore të vendit, Ministria për Europën dhe Punët e Jashtme ka përgatitur një dosje voluminoze rreth 1200 faqe, me materiale studimore, arkivore, ligjore, hartografike, fotografike, arkeologjike, minerale, hidrokarbure, navigacionale e të tjera”, shkruan Bushati.
Ndërkaq, ai kërkon që të mos braktiset vendimi Gjykatës Kushtetuese për marrëveshjen me Greqinë. “Për ne socialistët, Vendimi i Gjykatës Kushtetuese ishte jo vetëm udhërrëfyesi që duhet të ndiqnim me kujdes, por në të njëjtën kohë edhe linja e kuqe që nuk duhet shkelur”, deklaron Bushati.
Sipas tij, “Lojërat politike dhe akuzat duhet t’i lënë vendin një diskutimi serioz që udhëhiqet nga arsyeja shtetërore dhe interesi kombëtar”
/Gazetareforma.com/
