Analisti Andi Bushati deklaroi në emisionin “Të Paekspozuarit” në MCN TV se media në Shqipëri ndodhet në ditën e saj më të zezë dhe se, sipas tij, nuk meriton më të quhet media.
Ai tha se mediat janë kthyer në “makineri propagande dhe manipulative”, ndërsa akuzoi kryeministrin Edi Rama për manipulim të debatit mbi lirinë e medias dhe Sali Berishën për qasje selektive ndaj pronarëve të mediave.
“Media është në ditën e vet më të zezë. Nuk e di a e meriton emrin media. Për mua është kthyer në makineri propagande dhe manipulative. Ka pasur një dialog në distancë mes Saliut dhe Ramës. Këtu mediat i ka kapur të gjitha pushteti, gjë që është e vërtetë. Të bësh një radiografi të mediave dhe të merresh me mediat e Irfanit që e kanë sfilitur dhe të mos guxosh të përmendësh Klanin, je hipokrit. Berisha bën atë që bën me oligarkët: përmend 2 dhe nuk përmend 7. E keni dëgjuar të kritikojë Klanin, kur dihet se makineria e propagandës së Ramës është Topi dhe Klani.
Rama nga ana tjetër thotë se vendin më të madh në media e ka Berisha. Por Rama manipulon. Çështja e mediave që nuk është statistikë.
Çështja e mediave është kur shkon Arlindi në një minierë që të denoncojë një skandal dhe nuk e jep asnjë media, nuk është çështje sa kohë i dhe Berishës dhe sa i dhe Ramës. Për ta kuptuar ka një fakt: sa kohë kemi pa parë gazetari investigative. E mbajmë mend te emisoni yt si na nxorën për leckash. Doli emisioni po ngriti valixhet Ylli. Kjo është kritika që mund t’i bësh qeverisë. kjo është pjesa e manipulimit që bën Rama”, tha Bushati.
Sipas Bushatit, problemi kryesor nuk lidhet me minutazhin televiziv që merr një lider politik, por me mungesën e hapësirës për denoncime, skandale dhe gazetari investigative.
