Emigrimi masiv është shndërruar në një problem serioz për vendin tonë, teksa shifrat çdo ditë e më shumë paraqiten alarmante. Ndërkohë që gazetari dhe analisti Andi Bushati dekaroi se ikjet masive nga Shqipëria kanë nisur në 10-vjeçarin e fundit, që përkon edhe me vitet që Partia Socialiste po drejton Shqipërinë.
Sipas tij, kryesisht faji për këtë fakt është i kryeministrit Rama, me mënyrën se si po drejton vendin. Por gjithashtu, Bushati nuk lë mbrapa si shkaktare për ikjen masive të njerëzve edhe opozitën, e cila nuk ngjall shpresë.
“Në 10-vjeçarin e fundit, Shqipëria u bë vendi i kërkimit të azilantëve, jo të emigrantëve që ia kaloi Sirisë dhe Afganistanit që janë në luftë dhe padyshim që po t’i futemi analizës njerëzit ikin dhe pse s’ka një opozitë që jep shpresë dhe pse nuk shohin një të nesërme në këtë vend, pra nuk mund të përmblidhet te një njeri i vetëm, ama fakti është se ikjet masive përkojnë me ardhjen e Rilindjes në pushtet, ky është fakt,” u shpreh gazetari Bushati.
Sipas Bushatit, Rama nuk pranon se njerëzit marrin arratinë nga republika e ëndrrave që ka ngritur vetë ai, por thotë se këta që kanë ikur nga kjo republikë ëndrrash, nuk duhet trajtuar në mënyrë raciste, referuar këtu takimit të fundit që pati Rama me Sunak në Londër.
