Hetimet lidhur me grabitjen e 9 prillit në Rinas, ende vazhdojnë. Policia madje 3 javë më parë vendosi një shpërblim prej 10 mijë euro për këdo që do të jepte informacione të vlefshme për vendndodhjen e autorëve të dyshuar.
Një bum telefonatash ka pasur lidhur me vendndodhjen e vëllezërve Klement e Eldi Çalës, si dhe Talo Çelës të shpallur në kërkim lidhur me grabitjen e ndodhur në Rinas.
Por shumë pak telefonata kanë pasur një informacion të saktë lidhur me të kërkuarit nga policia. Të dhënat e grumbulluara janë verifikuar nga uniformat blu, por nuk i kanë çuar në gjurmët e tyre.
Më herët policia ka venë në pranga shtetasit Ragip Hajdini, Elton Pikli, Renaldo Sulaj, Oltjan Veseli, Saimir Cela dhe Alkond Bengasi.
Në datën 15 qershor, policia vuri në pranga edhe Hasan Kanaçin. Ky ishte personi i cili informoi grabitësit nga brenda aeroportit.
Ndërsa gjatë kontrollit të ushtruar në banesën e tij u gjetën rreth 100 mijë euro, të konvertuara në kartmonedha të ndryshme. Dyshohet se këto janë para nga grabitja e Rinasit.
I arrestuari, Arnold Bengasi është rimarrë në pyetje nga prokurorët, por ai ka kërkuar mbrojtje për familjarët e tij. Ai mendon se jeta e tyre është e rrezikuar, për shkak të bashkëpunimit të tij me policinë.
