Turqia dhe Mbretëria e Bashkuar kanë arritur që të nënshkruajnë një marrëveshje të tregtisë së lirë ditën e sotme, ndërkohë që Britania e Madhe po përgatitet të largohet nga orbita ekonomike e Bashkimit Evropian në fillim të vitit 2021.
Bëhet me dije se marrëveshja e cila do të hyjë në fuqi në 1 janar, synon të mbështesë tregtinë midis dy vendeve që vlente më shumë se 25 miliardë dollarë në 2019.
Kjo është një nga shumë marrëveshjet tregtare pas Brexit që qeveria britanike po ndjek me kombet anembanë botës dhe erdhi disa ditë pasi përfundoi një marrëveshje tregtare me BE.
Mbretëria e Bashkuar u largua nga BE në 31 janar të këtij viti por mbeti subjekt i rregulloreve të biznesit të bllokut dhe brenda bashkimit të saj doganor gjatë një periudhe tranzicioni që përfundon më 31 dhjetor 2020.
Ministri turk i Tregtisë Ruhsar Pekcan dhe Dominick Chilcott, ambasadori britanik në Turqi, nënshkruan marrëveshjen britanike-turke.
Pekcan përshëndeti marrëveshjen si paktin më të rëndësishëm tregtar për Turqinë që nga nënshkrimi i një marrëveshje të bashkimit doganor me BE në vitin 1995.
Një deklaratë e qeverisë britanike tha se marrëveshja do të sigurojë tarifa ekzistuese preferenciale për rreth 7,600 biznese britanike që eksportuan mallra në Turqi në 2019, duke siguruar rrjedhën e vazhdueshme të mallrave pa tarifa.
Të dy vendet kanë thënë se marrëveshja do të çojë në një marrëveshje më gjithëpërfshirëse në të ardhmen./Gazetareforma.com/
