Zëvendëskryeministri Erion Braçe, ka deklaruar nga studio e emisionit “Dita jonë”, se kanë qenë të shumta votat e pavlefshme në zgjedhjet lokale të 2019-ës.
Sipas tij, të gjitha ato vota janë kundër qeverisë dhe se për këtë Partia Socialiste duhet të jetë realiste. Faktorët që i kanë çuar votuesit në këtë zgjedhje të tyren, janë nga më të shumtat, por ai ka renditur tre faktorë.
“Votat e pavlefshme janë shumë dhe duhet të jemi realistë: ato janë vota kundër. Duhen lexuar shumë mirë nga secili prej kandidatëve dhe nga PS-ja për të kuptuar se çfarë nuk ka funksionuar në këtë aspekt. Faktori i parë ka lidhje me qeverisjen; faktori i dytë mund të jetë qeverisja vendore, ka shumë të pakënaqur sidomos në zonat rurale për infrastrukturën; faktori i tretë mund të jenë kandidatët”, u shpreh Braçe.
Kur u pyet se si do të veprohet me kryebashkiakët e opozitës të cilët kanë deklaruar se nuk do të largohen nga zyrat e tyre, zëvendëskryeministri u përgjigj:
“Janë deklarata që më ngjajnë si ato që nuk ka zgjedhje në 30 Qershor, që do të bëhej nami. Janë deklarata për të motivuar disa punonjës bashkie që të dalin në protestë me molotov në dorë në 8 korrik. Shteti ligjor do të veprojë për secilin nga personat që shkelin ligjin”.
