Pensionistët kanë protestuar sërish para Kryeministrisë, duke kërkuar rritje të pensioneve. Protesta e sotme ka zgjatur 90 minuta, me pensionistët që theksuan se shumica e parave që marrin janë të pamjaftueshme për të përballuar çmimet që kanë arritur nivele të larta. Një pensionist tha për mediat se bonusi i shpallur nga qeveria është një mashtrim i madh.
“Mua më del pensioni 171 mijë lekë të vjetra, që janë të pamjaftueshme për çmimet që kanë shkuar në stratosferë. Kryeministri i ka llogaritur për shportë, si ato shportat e derrave. Ne nuk jemi derra. Na thotë po s’u derdhën kontributet, nuk merrni lekë. Vetë ka rrogën 3 milionë lekë. Ai vetë vjedh kontributin me ligj. Bonusi është një mashtrim i madh, turp dhe djallëzi”, tha ai.
Protestat e pensionistëve dhe aktivistëve të Lëvizjes Bashkë kanë vijuar për disa javë, duke kërkuar pensione më të dinjitetshme dhe një minimum jetik për të përballuar shpenzimet e jetesës dhe problemet shëndetësore. Në shtator të këtij viti, Këshilli i Ministrave miratoi indeksimin e pensioneve me vetëm 4.1%, një vendim që ka shkaktuar reagime të forta nga qytetarët, aktivistët dhe shoqëria civile.
