Bllokohet buxheti i BE-së nga votat e dy shteteve anëtare. Hungaria dhe Polonia vendosën veton për buxhetin e Bashkimit Evropian për shtatë vitet e ardhshme prej rreth 1.8 trilion eurosh. Ato kundërshtojnë një klauzole që i lidh fondet me zbatimin e standardeve të shtetit ligjor. Bashkimi Evropian ka filluar procedurat e hetimit për të dy vendet për shkak të nismave ligjore që cenojnë pavarësinë e gjyqësorit.
Përveç buxhetit financiar për periudhën 2021-2027, pakoja përmban edhe fondin e rimëkëmbje ekonomike pas pandemisë së koronavirusit prej 750 miliardë eurosh.
Mosmiratimi i buxhetit për periudhën 2021-2027 ngre probleme edhe për dhënien pakos financiare prej 9 miliardë eurosh që Bashkimi Europian ka premtuar për projekte infrastrukturore në Ballkanin Perëndimor. Një pjesë e këtyre fondeve i janë premtuar Shqipërisë për të vazhduar axhendën e konektivitetit.
Takimi i ambasadorëve të 27 vendeve anëtare e pati të pamundur t’i ndezë dritën e gjelbër pakos sepse dy vendet, Hungaria dhe Polonia përdorën të drejtën e tyre të vetos.
Vendet anëtare të Bashkimit Evropian kanë rënë dakord paraprakisht që buxheti për periudhën 2021-2027 të jetë 1.1 trilion euro plus 750 miliardë për pakon e rimëkëmbjes. Buxheti dhe pakoja e rindërtimit duhet të votohen me unanimitet.
/GazetaReforma.com/
