Që prej orës 10:00 ka nisur seanca e jashtëzakonshme në Kuvend.
Pika e vetme e rendit të ditës, është dekretimi i Marsida Xhaferllarit si gjykatëse e Kushtetuese nga presidenti Ilir Meta.
Socialistët e kanë quajtur të papranueshëm dekretimin e Xhaferllarit, ndërsa i kanë bërë thirrje Metës, që të heqë dorë nga bllokimi i Kushtetuese.
Gjatë fjalës së tij nga foltorja, kryeministri Edi Rama u shpreh se Meta ka humbur busullën dhe po sulmon ndërkombëtarët.
Sipas kryeministrit, deklaratat e presidentit, e kanë vënë qeverinë në një pozitë jo komode dhe të turpshme me BE-në dhe SHBA-në.
“Presidenti ka humbur busullën. Përplasja mes Ilir Metës dhe Drejtësisë, duke qenë ne këtu 100% në të njëjtën linjë me SHBA dhe BE. Natyrisht pastaj është e lehtë të kuptohet pse si çdo herë tjetër, Ilir Meta nuk kursen as partnerët strategjikë dhe as dy aleatët e mëdhenj të pandryshueshëm të Shqipërisë, SHBA dhe BE, duke na vënë në një pozitë jokomode dhe të turpshme, sepse insinuon haptaz se këto përfaqësi të nderuara të shteteve që janë qysh në ditën e parë të procesit të Reformës në Drejtësi, promotore dhe mbështetëse të kësaj reforme, akuzohen si të korruptuara. Nuk ka më turp dhe pas kësaj nuk ka as nevojë të zgjatemi e të stërzgjatemi për të shpjeguar arsyet që na sjellin këtu dhe drejtësinë e vendimmarrjeve tona. Ndaj këtë herë s’do të merrem me Ilir Metën por me drejtësinë. Me drejtësinë që është në ardhje dhe kërkon shumë vullnet, shumë durim”, tha Rama.
Kujtojmë këtu se ditën e djeshme konferenca e kryetarëve, doli me një projekt rezolutë, pë të reflektuar në lidhje me vendimin e Metës, për të dekretuar Marsida Xhaferllarin si anëtare të Gjykatës Kushtetuese.
