Kryeministri Edi Rama ka refuzuar përgjigjen në lidhje me aksidentin e përmendur të ish-ministrit Arben Ahmetaj, ku u fol se ishte në makinë me biznesmenin që ka përfituar koncesion për inceneratorët, Mirel Mërtiri.
I pyetur në lidhje me këtë çështje në konferencën e mbajtur para gazetarëve, për çështjet e ekonomisë, Rama tha se ai nuk merret me survejime në vrimën e çelësit, se kush udhëton me kë, se kush është bashkëshortja e kujt, por për të ka rëndësi çështja e plehrave.
“Refuzoj të përgjigjem se unë nuk merrem me survejime në vrimën e çelësit, se kush udhëton me kë, dhe se kush është bashkëshortja e kujt, nuk është kjo detyra ime. E vetmja gjë që mund t’iu them është që të shihni gjendjen e plehrave, procedurat nuk janë punët e mija, unë shoh vetëm rezultatin. Një gjë u them se shpifjet, sajesat, më shumë se këtë herë nuk kanë qenë ndonjëherë bashkë, përballë një investimi modern. Janë të verbuar,”– tha Rama ndër të tjera.
/GazetaReforma.com/
