Këshilli i Ministrave miratoi mbrëmjen e djeshme disa ndryshime dhe shtesa në Aktin Normativ në kuadër të masave të marra, për përballimin e situatës së krijuar nga COVID-19.
Sipas ndryshimit, bizneset e vogla, nuk do të të paguajnë qira për dy muaj, shto këtu edhe ato që nuk ishin në listën e aktiviteteve të mbyllura.
Detyrimet e prapambetura do të paguhen nga qiramarrësi në mënyrë proporcionale dhe të dakordësuar me qiradhënësit, pas majit të 2020-ës.
Për kontratat që mbarojnë në maj, detyrimet do paguhen brenda 3 muajve pas datës 31 maj.
Ndryshimi në Aktin Normativ
“Të gjithë qiramarrësit, persona fizikë/juridikë, me të ardhura deri në 14 000 000 (katërmbëdhjetë milionë) lekë në vit, të cilët kanë kontratë noteriale qiraje për zhvillimin e aktivitetit të tyre ekonomik, të nënshkruar përpara shpalljes së gjendjes së epidemisë, pavarësisht nëse e kanë të lejuar apo të ndaluar aktivitetin si pasojë e gjendjes së shkaktuar nga COVID–19, nuk do ta paguajnë detyrimin e qirasë për dy muaj, prill dhe maj 2020.”.
Detyrimi i prapambetur i këtyre dy muajve do të paguhet nga qiramarrësi, në mënyrë proporcionale dhe të dakordësuar me qiradhënësin, pas muajit maj 2020. Për ato kontrata që përfundojnë përpara afatit 31 maj 2020, detyrimi i prapambetur do të paguhet nga qiramarrësi brenda tre muajve pas datës 31 maj 2020.
Të gjithë qiramarrësit e përcaktuar në këtë pikë, të cilët kanë ankesë për qiradhënësin si pasojë e moszbatimit të detyrimeve të mësipërme, do t’i drejtohen Drejtorisë së Përgjithshme të Tatimeve nëpërmjet komunikimit elektronik. Qiradhënësit, të cilët nuk e zbatojnë këtë pikë, dënohen me gjobë në masën e pesëfishit të qirasë mujore përkatëse. Ngarkohet Drejtoria e Përgjithshme e Tatimeve për ndjekjen dhe zbatimin e parashikimeve të kësaj pike dhe nxjerrjen e udhëzimeve përkatëse.”.
Mbremjën e djeshme ndërkohë, kryeministri Edi Rama prezantoi edhe paketën e dytë ekonomike, të vlefshme deri në fund të muajit maj.
Kujtojmë këtu se në paketën e parë ekonomike, u përfshinë bizneset e vogla me xhiro nga 0 në 14 milion lekë, që do të marrin një pagë prej 260 mijë lekësh të vjetra, ndërsa ndihma ekonomike dhe kësti për të papunët do të dyfishohet
