Këtë të premte GJKKO vendos të kalojë për gjykim çështjen për inceneratorin e Fierit. Të pandehur për këtë çështje janë marrë ish-ministri Lefter Koka, Alqi Bllako dhe 18 persona të tjerë. Çështja ndaj Lefter Kokës, Alqi Bllakos dhe 8 të tjerëve tashmë do të gjykohet në themel. GJKKO ka kërkuar saktësimin e akuzave. Për Alqi Bllakon kërkon ndryshim akuze pasi nuk e konsideron zyrtar të lartë. Ka qenë vetë Bllako i cili kërkoi që të rrëzohet akuza pasi sipas tij nuk sekretari i përgjithshëm i Ministrisë së Mjedisit nuk mund të cilësohet zyrtar i lartë. Ndërsa Gjykata e Posaçme ka rrëzuar akuzën për korrupsion pasiv i personave që ushtrojnë funksione publike dhe shpërdorim detyre për ish zëvendës/presidentin e FSHF Arben Dervishajn, supervizor i punimeve të inceneratorit. Ky i fundit do të akuzohet vetëm për veprat penale të “falsifikimit të dokumenteve” dhe “korrupsion pasiv në sektorin privat”. Po kështu gjykata rrëzon kërkesë e avokatëve për më shumë kohë për t’u njohur me akuzat e reja pas ndryshimit të tyre.
Ndërkohë në lidhje me këtë ka reaguar edhe Ish-ministri i Drejtësisë Ylli Manjani. Sipas Manjanit Prokuroria e Posaçme Anti Korrupsion ka kryer arrestime absurde në çështjen e inceneratorëve dhe se SPAK po akuzon kot pa ligj e fakte “peshqit e ngordhur”, duke mos zbuluar të vërtetën dhe largohet gjithnjë e më shumë nga “peshku i madh”.
Manjani rendit zyrtarët e lartë të arrestuar për çështjen e inceneratorëve, ku thotë se ‘Lefterin e akuzojnë për korrupsion pa asnjë qindarkë të kapur, kur në fakt veprimtaria duket si evazion i firmës. Alqin e akuzojnë për vendimet që janë të qeverisë, jo të shërbimit civil. Arben Dervishin inxhinierin privat e akuzojnë për krime që i takojnë detyrës publike që nuk e ka”.
