Niveli i lumit Vjosa ka rënë këtë mëngjes, por dhjetëra hektarë tokë bujqësore është ende nën ujë.
Situata paraqitet më e qetë. Uji është larguar nga banesat, duke lënë pas baltë dhe llum. Gjatë natës, banorët kanë qëndruar te familjarët e tyre.
Përmbytjet ju kanë shkatërruar elektroshtëpiaket.
Kryeministri Edi Rama ka shkuar sot në zonat e përmbytura në Jug të vendit. Inspektimet për të parë nga afër zonat e përmbytura kreu i qeverisë i ka nisur nga ura e Mifolit, zona më e prekur nga përmbytjet. Në këtë zonë lumi Vjosa doli nga shtrati për shkak të prurjeve të shumta dhe përmbyti shumë toka dhe banesa. Banesat e qytetarëve në Novoselë dhe në fshatra të tjerë kanë qenë të bllokuara, ndërsa sot uji është larguar por ka lënë pas baltë dhe inerte.
Deri tani mësohet se për shkak të daljes nga shtrati të këtij lumi janë përmbytur rreth 1 mijë hektar toka.
Përmbytjet ju kanë shkatërruar elektroshtëpiaket dhe qytetarët apelojnë për ndihmë.
“Unë bëj thirrje kush të më ndihmojë, kush e dëgjon, qeveria tek ajo mbështetemi, edhe bizneset të na ndihmojnë. Emergjencat kanë qenë, kur erdhi uji nuk futej këmbë robi. Shyqyr që doli dielli që të ngrohemi, por çfarë do të bëjmë natën. Fëmijët i kemi të larguar, gjithsekush punon për vete, nuk di çfarë të bëj gruan e kam me problem shëndetësore”, thotë një banor për “Top Channel”.
