Aleksandër Vuçiç ka nisur zyrtarisht mandatin e dytë pesë vjeçar si president i Serbisë. Ndërkohë që bëri betimin, nuk la pa përmendur “fiksimin” e tij Kosovën.
“Betohem se të gjitha fuqitë e mia do t’i përkushtoj për ruajtjen e sovranitetit dhe tërësisë së territorit të Republikës së Serbisë, duke përfshirë Kosovën dhe Metohinë si pjesë integrale të saj”, deklaroi Vuçiç,
Presidenti nënvizoi gjatë adresimit të tij se Serbia duhet të kërkojë një kompromis për çështjen e Kosovës dhe tha se kjo temë do të jetë edhe më e theksuar gjatë muajve në vijim.
“Për shkak të krizës në Ukrainë, çështja e Kosovës do të jetë edhe më e spikatur dhe e vështirë për ne për t’u zgjidhur”, tha Vuçiç. Ai shtoi se kjo temë është më e rëndësishme për shkak të asaj që thotë presidenti rus, Vladimir Putin, se “Kosova nuk është si shembujt e tjerë në botë”.
Presidenti serb u zotua të ruajë neutralitetin ushtarak të vendit të tij, teksa e konsideroi problem faktin që rrethohet nga shtete dhe territore anëtare në NATO.
Vlen të theksojmë se presidenti i Serbisë, Vuçiç dhe kryeministri i Shqipërisë, Edi Rama kanë një marrëdhënie shumë të mirë më njëri-tjetrin, ku nuk mungojnë as takimet informale.
Nuk e dimë nesë Rama do të reagojë në lidhje me deklaratën e mikut të tij Vuçiç, e cila cënon drejtëpërdrejt sovranitetin e Kosovës.
