Ditën e sotme ish-kryeministri Sali Berisha ka publikuar një video, e cila bëri xhiron e rrjetit pasi shihej se një polic po dhunonte një qytetare në Vlore.
Berisha e cilësoi këtë një trajtim shtazor që u bëhet qytetarëve nga policia e Edi Ramës, që shfrytëzon epideminë për të vendosur mbi qytetarët shtypjen e egër, madje bëri thirrje për t’u ngritur në të gjitha format e protestave dhe mosbindjes civile për të kundërshtuar veprimet e policit.
Mirëpo, e vërteta qenka ndryshe, pasi Policia e Vlorës me anë të një njoftimi për mediat bën me dije se në të vërtetë efektivi i shpëtoi jetën gruas në video.
Mesditën e sotme ajo është futur me rroba në det, duke tentuar t’i japë fund jetës, por është nxjerrë nga polici.
Më pas, 40-vjeçarja ka tentuar sërish të futet në ujë dhe punonjësi i Policisë është munduar që ta ndalojë dhe në këtë moment asaj i ka rënë të fikët, por është dërguar menjëherë në spitalin e Vlorës dhe pas ndihmës së parë mjekësore, ndodhet jashtë rrezikut për jetën.
Njoftimi i policisë
Punonjësi i Policisë ndërhyn dhe shpëton një grua, e cila tentoi të vetëmbytej në det. Punonjësit e Patrullës së Përgjithshme të Komisariatit të Policisë Vlorë që kryenin shërbimin në zonën e Ujit të Ftohtë, Vlorë, kanë konstatuar një shtetase që ishte futur në ujë dhe po lëvizte në drejtim të thellësisë së detit. Menjëherë, njëri nga punonjësit e Policisë, me detyrë oficer i Patrullës së Përgjithshme pranë Komisariatit të Policisë Vlorë është futur në ujë dhe ka bërë të mundur nxjerrjen e 40-vjeçares në anë të detit dhe ka njoftuar autoambulancën për ta shoqëruar për në spital. Në momentin që punonjësi i Policisë e ka nxjerrë nga uji, zonja ka tentuar sërish të futet në ujë dhe punonjësi i Policisë është munduar që ta ndalojë, por zonjës i ka rënë të fikët. Punonjësit e Policisë e kanë dërguar menjëherë në spitalin e Vlorës dhe pas ndihmës së parë mjekësore, 40-vjeçarja ndodhet jashtë rrezikut për jetën.
Kliko këtu për të pare videon e plotë: Njoftim nga Policia e Vlorës
