Ish-deputeti i Partisë Demokratike, Mark Marku, i cili hoqi dorë nga mandati i fituar në zgjedhjet e 25 prillit, ka thënë se Sali Berisha duhet të ishte larguar nga partia që në vitin 2013. I ftuar në emisionin „Opinion“, Marku ka thënë se nëse Berisha nuk e kuptonte këtë gjë as në vitin 2017, atëherë Basha duhet ta kishte larguar, e t’i bënte të qartë se mund të qëndronte në PD vetëm si figurë honorifike.
Marku u shpreh se nëse PD vazhdon në këtë mënyrë, nuk e mbron dot Berishën dhe do të humbasë energji dhe forca kot.
“Berisha duhet të ishte larguar në 2013. Basha nëse Berisha nuk e kuptonte në 2017 duhet ta kishte larguar, shko në punën tënde. Do të bëjmë një muze në PD, do kemi figurën horonikfike, por në PD nuk do të vazhdosh të jesh. Nuk mund ta kthesh kohën mbrapsh. Po ndodh me dhunë dhe në mënyrë të pandershme në pikëpamjen politike. Nëse PD vijon kështu do humbasi energji kot, duhet të gjendet një mënyrë tjetër, nuk e mbron kështu Berishën. Nuk e kthen dot kohën pas. Kjo është pamundësia e njeriut për të njohur fundin e tij. Nëse PD vazhdon kështu, do të humbi forca”, tha Mark Marku.
