Partia Demokratike ka njoftuar se më 16 maj, në orën 17:00, do të organizojë një protestë në Bulevardin e Ri.
Kjo datë përkon me zhvillimin e Samitit të Komunitetit Politik Evropian në Tiranë, çka ka sjellë edhe refuzimin e kërkesës nga ana e Policisë së Tiranës për zhvillimin e tubimit.
Autoritetet policore kanë argumentuar se protesta nuk mund të lejohet për shkak të masave të rrepta të sigurisë të vendosura në kryeqytet me rastin e samitit, përfshirë edhe ndalimin e grumbullimeve në zonën ku zhvillohen aktivitetet zyrtare.
Në një deklaratë për mediat, Sali Berisha u shpreh se protesta do të mbahet pavarësisht ndalimit, me synimin për të “sensibilizuar udhëheqësit evropianë që ndodhen në një vend ku nuk respektohet vota e lirë dhe as rregullat demokratike”.
