Ish-kryeministri Sali Berisha ka filluar konferencën e paralajmëruar për shtyp pas vendimit të SHBA-ve për të shpallur “non-grata” atë dhe familjen e tij. Berisha ka thënë se ai ka udhëzuar avokatin e tij në një vend neutral, siç është Franca, që të padisë Sekretarin Amerikan të Shtetit, Anthony Blinken për shpifje. Berisha tha se avokati i tij e ka informuar se Blinken nuk ka imunitet dhe se akuzat e ngritura janë pa fakte.
“Jam këtu për t’iu informuar për një vendim të pazakontë por të rëndësishme. Për arsye të panjohura për mua Sekretari Amerikan i Shtetit ka publikuar dje në mënyrën më të papritur dhe shpifëse të pavërteta për personalitetin tim.
Dua të theksoj se që kur kam filluar jetën time politike, po të shkoni më tutje, që kur kam prekur rrogën e parë në borderotë e shtetit dhe që ditën e djeshme, nuk ka njeri në botë që mund të thotë që kam qenë apo jam i implikuar në një aferë të çfarëdoshme korruptive. Kam udhëzuar avokatin tim që të padisë për shpifje. Blinken mundet të mendojë se është i mbrojtur, por nuk është ashtu. Padia është ngirtur nga avokati im francez, në Francë. Jam konsultuar me të dhe jam i sigurtë që Blinken nuk ka imunitet. Ai është bërë pjesë e një parodie”, ka thënë Berisha.
