Ish-kryeministri dhe kreu i Partisë Demokratike, Sali Berisha paraqitet në Prokurorinë e Posaçme, në kuadër të zbatimit të masës së sigurisë “detyrim për t’u paraqitur”, si i pandehur në çështjen e njohur si afera “Partizani”.
Çështja ndaj Berishës ka kaluar për gjykim më 19 maj, dhe ai akuzohet për korrupsion pasiv të funksionarëve të lartë, gjatë kohës kur ushtronte funksionin e kryeministrit.
Sipas dosjes së SPAK, Berisha ka ndërmarrë veprime konkrete nëpërmjet ligjeve dhe akteve nënligjore që favorizonin ndërtimin në truallin e ish-kompleksit sportiv “Partizani”, ku përfitues rezulton të ketë qenë dhëndri i tij, Jamarbër Malltezi.
Malltezi, përveç akuzës për korrupsion, po hetohet edhe për pastrim parash. Sipas hetimeve, ai ka përfituar në mënyrë të parregullt 5.4 milionë euro përmes një projekti ndërtimi, ku rolin kyç e kanë pasur vendimet e qeverisë së kohës të firmosura nga Berisha.
Deri tani janë zhvilluar dy seanca gjyqësore në lidhje me këtë çështje, të cilat janë shtyrë, ndërsa seanca e radhës është planifikuar për datën 15 shtator.
