Kryetari i Partisë Demokratike, Sali Berisha, është liruar nga masa e arrestit shtëpiak pas një vendimi të fundit të Gjykatës së Posaçme. Gjyqtarja Flojera Davidhi vlerësoi se nuk ekzistojnë më kushtet për zbatimin e kësaj mase sigurie.
Avokati i Berishës, Genc Gjokutaj, njoftoi se nga sot ish-kryeministri është i lirë dhe nuk ka asnjë masë sigurie ndaj tij.
Gjykata Kushtetuese kishte vlerësuar më parë se veprimet e SPAK për të mos kërkuar autorizim nga Kuvendi për masën “Detyrim paraqitje” ishin të ligjshme, ndërsa masa e “Ndalimit për të dalë jashtë vendit” u shfuqizua për shkak të mungesës së proporcionalitetit.
Pas mosrespektimit të masës “Detyrim paraqitje”, GJKKO kishte vendosur masën e arrestit shtëpiak për Berishën.
Sali Berisha dhe dhëndri i tij, Jamarbër Malltezi, janë të pandehur nga SPAK për privatizimin e terreneve të Klubit të Futbollit dhe Klubit Shumësportësh “Partizani”. Akuza kryesore ndaj Berishës është për “korrupsion pasiv të funksionarëve të lartë shtetërorë”, ndërsa Malltezi akuzohet gjithashtu për “pastrim të produkteve të veprës penale”. Hetimi, i nisur në vitin 2020, përqendrohet në dyshimet për abuzime gjatë privatizimit të këtyre pronave.
