Kreu i PD, Sali Berisha, gjatë fjalës së tij në 34-vjetorin e themelimit të degës së Partisë Demokratike në Elbasan, u zotua për mbajtjen e çdo premtimi.
Ai deklaroi se një nga masat e para që do të marrë qeveria e tij brenda tre muajve të parë është vendosja e minimumit jetik prej 200 eurosh dhe paga minimale nën 500 euro nuk do të lejohet.
Sipas Berishës, çdo qytetar në nevojë do të përfitojë një minimum prej 200 eurosh, përfshirë të papunët, pensionistët me pension të pjesshëm dhe ata që marrin ndihmë ekonomike.
Për më tepër, ai premtoi një lehtësim të ndjeshëm të barrës financiare për qytetarët përmes kartës së konsumatorit prej 450 eurosh, e cila do të shpërndahet çdo gjashtë muaj për ata me paga minimale.
“Do t’i japim fund mjerimit. Qytetarët shqiptarë sot blejnë ushqime dhe udhëtojnë me çmime më të larta se në vendet europiane. Kjo situatë do të ndryshojë. Çdo premtim do ta mbajmë 100%,” tha Berisha.
Kryedemokrati akuzoi qeverinë aktuale për krijimin e një hendeku të madh ekonomik mes qytetarëve dhe pushtetarëve, duke denoncuar korrupsionin dhe pasurimin e paligjshëm.
Ai shtoi se pensionistët shqiptarë aktualisht marrin shumë më pak krahasuar me fqinjët e rajonit dhe premtoi rritje të ndjeshme të pensioneve.
Në përmbyllje, Berisha garantoi se vendimet për uljen e çmimeve dhe rritjen e të ardhurave do të jenë prioritet absolut për PD nëse vjen në pushtet.
