Ish-kryeministri i Shqipërisë, Sali Berisha, ka reaguar sot gjatë fjalimit nga dritarja e banesës së tij, në lidhje me protestat e mësuesve sot. Ai iu drejtua një grupi mësuesish që protestonin përpara Kryeministrisë, në Ditën Ndërkombëtare të Punëtorëve, duke i ftuar ata të bashkohen me opozitën.
Berisha u shpreh: “Mirëmbrëma dhe përshëndetjet më të përzemërta. Sot, një grup mësuesish guximtarë protestuan para kryeministrisë për shkak të poshtërimit të arsimit nën qeverisjen e Edi Ramës.” Ai shtoi se kualiteti i arsimit ka pësuar një rënie të thellë gjatë 11 viteve të fundit.
Berisha i bëri thirrje mësuesve: “Bëhuni luftëtarë të drejtë të kauzës suaj. Ju sot jeni mësuesit më të keqpaguar në rajon dhe në Europë… Fondet që ekzistojnë për përmirësimin e rrogave tuaja janë vjedhur. Bashkohuni me ne, se beteja jonë kundër hajdutëve që zhdukin para në bankat offshore dhe në ndërtime luksoze, është edhe kauza juaj. Është kauzë e drejtë.”
