Sali Berisha ka dalë në një konferencë me gazetarët, ku e ka konsideruar të dëmshëm vendimin e qeverisë për legalizimin e kanabisit.
“Sot jam këtu në një bisedë me ju ë pari dhe para të gjithash për vendimin absolutisht të dëmshëm për Shqipërinë dhe shqiptarët, që Edi Rama po merr për legalizimin e kanabisit.
Është një vendim për legalizimin e krimit, vrasjeve, drogimit të të rinjve dhe të popullatës, rrënimit të shëndetit fizik dhe mendor, si dhe të identitetit të shqiptarëve, reputacionit të tyre.
Unë në formimin tim si mjek, por edhe si politikanë, kam lexuar gjerësisht për kanabisin, jam plotësisht i vetëdijshëm se vaji i kësaj bime, apo nënproduktet përdoren për lehtësimin e ankthit, në këtë kontekst të dhëna nga mjekët nuk kanë ndonjë pasojë.
Por studimet kanë faktuar se kanabisi krijon probleme serioze strukturore, dhe në proceset e trurit, kanë faktuar se shumëfishon, çfaqjen e psikozave më të rënda. Kanë faktuar se jep ndryshime në trurin e përdoruesve. Kanabisi ka të paktën 50 lëndë kimike, që nuk dihen se çfarë shkaktojnë në trurin e njeriut”, tha mes të tjerave Berisha.
Sipas Berishës, legalizimi i kanabisit në vendin tonë do të sillte pasoja në procesin e hapjes së negociatave.
“Edi Rama zgjedh kanabisin për ta bërë simbol të shqiptarëve, vendimi i tij është një akt shumë i pamenduar, pasi ju garantoj se dëmton procesin e integrimit në BE.
Edi Rama shfrytëzon një rrymë pozitive që i është krijuar për hapjen e negociatave me Shqipërinë dhe Maqedoninë e Veriut, për shkak të luftës në Ukrainë, por ky është një kalkulim i gabuar, pasi kanabisi shqiptar është krim, krim dhe vetëm krim, është organizata kriminale. Pikërisht në momentin kur po krijohej një klimë pozitive për hapjen e negociatave, sinjali që jep ky është që do të legalizojë kanabisin, kur Italia shpenzon edhe miliarda euro për të mbrojtur kufirin e saj.
Në vitin 2011 Italia kishte hequr kontrollin, për drogë, në një vit u kapën vetëm 12 kilogramë kokainë, dhe një sasi jo e madhe kanabisi, por sot që kanabisi legalizohet ju e kuptoni vetë se çfarë do të thotë kjo.
Mos u çudisni një ditë që në vendin ku shihni platacione me rrush dhe me mollë, të vihet zjarri dhe të mbillet kanabis,. Kjo e bën Shqipërinë një vend problematik për të gjithë rajonin, dhe rrit rrezxikun e investimit nga organizata kriminale dhe terroriste.
Për të gjitha këto unë iu bëj thirrje shqiptarëve që të kundërshtojnë dhe të mos mbështesin një politikë shkatërrimtare, me legalizimin e kanabisit hiqet çdo barrikadë që ekziston për atë si një drogë e rrezikshme, do shohim drogim masiv të të rinjve dhe të popullatës”, tha më tej Berisha.
