Bënin namin në shtëpitë e korçarëve, dy në pranga dhe një në kërkim

Dy persona kanë rënë në prangat e policisë së Korçës, ndërsa një i tretë është shpallur në kërkim.

Ata akuzohen se në bashkëpunim me njëri –tjetrin, kanë grabitur një sërë banesash.

Orenditë e vjedhura ata i shisnin më pas.

Ndaj pikës së shitjes është vendosur sekuestro preventive.

Objektet e vjedhura ishin kryesisht, soba, televizorë dhe orendi të ndryshme shtëpiake.

Deri më tani blutë e Korçës kanë arritur të dokumentojnë 3 grabitje.

Materialet i kaluan Prokurorisë së Korçës për veprime të mëtejshme.

Njoftimi i policisë:

Finalizohet operacioni policor i koduar “Banesat”.

Operacioni i zhvilluar për të goditur veprimtarinë kriminale në fushën e vjedhjes së banesave në qytetin e Korçës.

Vidhnin në banesa orendi të ndryshme shtëpiake, procedohen penalisht 4 shtetas, 2 prej të cilëve të arrestuar në flagrancë, 1 shtetas në gjendje të lirë dhe 1 tjetër në kërkim.

Vendoset masa e sekuestros preventive për pikën e shitjes, në të cilën keta shtetas tregtonin sendet e vjedhura, një pjesë e të cilave u sekuestrua në cilësinë e provës materiale.

Shërbimet e Komisariatit të Policisë Korçë, në vijim të punës për zbardhjen dhe dokumentimin e disa vjedhjeve të ndodhura në qytetin e Korçës, kapjen dhe vënien para përgjegjësisë ligjore të autorëve kanë organizuar dhe finalizuar operacionin e koduar “Banesat”, si rezultat i të cilit u bë arrestimi në flagrancë i shtetasve

• K.I, 28 vjeç, (i dënuar më parë disa herë për veprën penale “Vjedhja”),
• K.S, 26 vjeç.

Gjithashtu filloi procedimi penal në gjendje të lirë ndaj shtetasit:

• A.K, 20 vjeç.

Si edhe u shpall në kërkim shtetasi:

• T.L, 34 vjeç, banues në Korçë (i dënuar me parë disa herë për veprën penale “Vjedhja”).

Nga veprimet hetimore të kryera, dyshohet se këta shtetas në bashkëpunim me njëri-tjetrin, të jenë autorë të ngjarjeve të mëposhtme:

Në datë 04.08.2018, është vjedhur banesa e shtetases M.K, në lagjen nr.12, ku është marrë një televizor.

Në datën 16.10.2019, janë vjedhur banesat e shtetasit Th.Ç, dhe shtetases P.G, në lagjen nr.4, ku janë vjedhur tre televizorë dhe tre soba.

Në datën 18.10.2019, është vjedhur banesa e shtetasit I.K, në lagjen nr.1, ku kanë marrë sende dhe orendi të ndryshme shtëpiake.

Shtetasit K.I, A.K dhe T.L, sendet e vjedhura në banesa, të cilat u sekuestruan në cilësinë e provës, i shisnin më pas tek pika e tregtimit të shtetasit K.S., në lagjen nr.8 të qytetit, ndaj së cilës u vendos masa e sekuestros preventive.

Vijon puna për kapjen e shtetasit T.L, si dhe dokumentimin me prova ligjore edhe të disa vjedhjeve të tjera, ku autorë të tyre dyshohet të jenë shtetasit e lartpërmendur.

Materialet i kaluan Prokurorisë pranë Gykatës të Shkallës së Parë Korçë për veprat penale “Vjedhja më shumë se një herë, kryer në bashkpunim” dhe “Përvetësimi i parave ose mallrave që rrjedhin nga vepra penale ose veprimtaria kriminale”.