Kryeministri Edi Rama ka reaguar për herë të parë sa i përket zgjedhjes së kryebashkiakut të zgjedhur të Himarës, Fredi Beleri si eurodeputet në Parlamentin Europian, dalë nga lista e partisë Demokracia e Re në Greqi. Kreu i qeverisë shqiptare ka preferuar të mos komentojë situatën, duke thënë se ndodhet në Prishtinë dhe nuk do që ta flasë. Sipas Ramës, poltika e jashtme për fat të keq është bërë politikë e brendshme.
Edi Rama: Nuk kam asnjë koment për këtë, jam në Prishtinë. Për fat të keq politika e jashtme është bërë politikë e brendshme, një tendencë që thellon më shumë, që mund të sjellë më shumë vota këtu po i bën më shumë dëm Kosovës jashtë.
Partia Demokracia e re e kryeministrit Kyriakos Mitsotakis, ka kryesuar në zgjedhjet europiane të së dielës, duke siguruar që të fitojë 7 nga 21 ulëset që i takojnë në parlamentin europian Athinës zyrtare. Sipas rezultateve të deritanishme në rang vendi, partia që drejtohet nga kryeministri grek, ka fituar rreth 28% të votave, e cila përkthehet në 7 deputetë, përfshirë edhe kryebashkiakun e zgjedhur të Himarës në Shqipëri, Fredi Beleri, i cili prej më shumë se një viti mbahet i burgosur në Shqipëri.
Beleri ka marrë 235 mijë vota duke u renditur i katërti mes 7 deputetëve që kanë dalë nga partia Demokracia e Re e kryeministrit grek Mitsotakis. Beleri u dënua me 2 vite burg në Shqipëri pasi u kap duke blerë vota në zgjedhjet vendore të 2023. Çështja ndaj tij ende nuk ka marrë një vendim përfundimtar në Apelin e Posaçëm, ndërkohë që mes përplasjeve të brendshme në parti, Mitsotakis vendosi që ta fuste në listën e kandidatëve për eurodeputetë.
