“Po fillojmë të kthejmë faqen në një vit të vështirë. Vaksina është dorëzuar. Vaksinimi do të fillojë nesër në BE”. Kështu deklaroi Presidentja e Komisionit Evropian Ursula von der Leyen. Në një postim në “Twitter”, Von der Leyen i cilësoi momente të unitetit.
“Ditët Evropiane të Vaksinimit janë një moment prekës i unitetit. Vaksinimi është çelësi për të dalë nga pandemia”, shtoi ajo.
Kompania amerikane Pfizer, në bashkëpunim me atë gjermane, BioNTech po përgatiten që të dërgojnë 12.5 milionë doza të vaksinës që kanë prodhuar kundër koronavirusit në vendet e Bashkimit Evropian.
Shtetet e BE-së, përfshirë Gjermaninë, Francën, Austrinë dhe Italinë, planifikojnë që të nisin vaksinimin prej 27 dhjetorit, teksa Evropa po mundohet që të ece me hapin e Shteteve të Bashkuara dhe Britanisë, shtete këto që më herët gjatë këtij muaji nisën vaksinimin, shkruan agjencia e lajmeve, Reuters.
Sipas rregullatorit të barnave të Bashkimit Evropian, vaksinën kundër koronavirusit mund ta marrin qytetarët mbi moshën 16-vjeçare.
Kontingjenti i parë prej 150,000 dozash të vaksinës, pritet të arrijë në Gjermani më 26 dhjetor, gjë që do të lejojë autoritetet që të nisin fushatën e vaksinimit, fillimisht në shtëpitë e pleqve më 27 dhjetor.
Ndërkaq, rregullatori në Zvicër – shtet ky që nuk është pjesë e BE-së – e miratoi përdorimin e vaksinës gjatë fundjavës.
/Gazetareforma.com/
