Në Bashkimin Evropian vazhdojnë të theksojnë se masat ndëshkuese të vendosura ndaj Kosovës në vitin 2023 janë të përkohshme dhe mund të tërhiqen në varësi të veprimeve të ndërmarra në terren.
Sipas zyrtarëve të Komisionit Evropian, për të hequr këto masa është e nevojshme pajtimi i të gjitha shteteve anëtare.
Këtë konfirmoi më 15 nëntor zëdhënësi i BE-së për çështje të politikës së jashtme dhe sigurisë, Peter Stano.
“Përgjigja është sikurse herën e fundit. Çështja është duke u shqyrtuar në Këshill dhe do të vendoset nga vendet anëtare pa marrë parasysh se kur do të nisin mandatin institucionet e reja”, u përgjigj Stano në pyetjen se a do të hiqen masat ndëshkuese ndaj Kosovës para përfundimit të mandatit të Komisionit aktual Evropian apo do të pritet përbërja e Komisionit të ri.
Sipas burimeve diplomatike të Bashkimit Evropian, në diskutimet e fundit rreth këtij çështjeje, shumica e shteteve anëtare janë shprehur pro heqjes së masave, ndërsa askush nuk ka kundërshtuar në mënyrë të prerë këtë hap.
BE vendosi masa ndëshkuese ndaj Kosovës vitin e kaluar për shkak të rritjes së tensioneve në veri të Kosovës, një zonë e banuar me shumicë serbe.
Sipas burimeve, disa shtete anëtare kanë kërkuar që masat të hiqen menjëherë, ndërsa një grup tjetër ka kërkuar që Bashkimi Evropian të ketë një qasje më të balancuar ndaj Kosovës dhe Serbisë.
Ky grup është shprehur se mbajtja në fuqi e masave vetëm për një palë nuk është një qasje e drejtë.
Ata kanë theksuar gjithashtu se Serbia nuk ka ndërmarrë asnjë veprim për të sjellë para drejtësisë ata që janë përgjegjës për sulmin e armatosur në Banjskë të Zveçanit, të ndodhur në shtator të vitit 2023.
Kosova ka akuzuar Serbinë për përfshirje në sulm, por Beogradi e ka mohuar këtë.
