Bashkimi Evropian i ka kërkuar Shqipërisë të rimbursojë më shumë se 33.5 milionë euro të programit IPARD 2, pasi këto fonde janë konsideruar të shpenzuara në mënyrë jo të rregullt gjatë viteve 2020-2022. Pas hetimeve, Zyra Evropiane Kundër Mashtrimit ka identifikuar 52 raste abuzimi me grantet që BE vë në dispozicion për zhvillimin rural.
Në një reagim zyrtar, Komisioni Evropian theksoi se çdo shumë e përdorur në mënyrë të parregullt duhet t’i kthehet buxhetit të BE. Sipas tij, qeveria shqiptare ka angazhuar një kompani të jashtme për të kryer një auditim të plotë të grantimeve dhe pagesave të IPARD II, si edhe të sistemit të ri të menaxhimit dhe kontrollit. Autoritetet shqiptare kanë marrë tashmë rekomandimet e auditimit dhe po shqyrtojnë masat korrigjuese.
Shqipëria rezulton me shifrën më të lartë të fondeve të shpenzuara në mënyrë të parregullt në rajon, duke tejkaluar edhe Turqinë. Komisioni Evropian, në përgjigjen për A2, kërkoi trajtim maksimalisht serioz të çështjes nga autoritetet shqiptare, duke kujtuar se bëhet fjalë për fondet e taksapaguesve të BE. BE shprehu gatishmërinë për të vijuar mbështetjen ndaj fermerëve dhe sektorit agro-ushqimor, por vetëm nëse garantohet mbrojtja e interesave financiare të unionit.
Pezull mbeten edhe fondet e programit IPARD 3, që kapin vlerën totale prej 146 milionë eurosh, nga të cilat 112 milionë financim i BE. Me fondet që skadojnë në vitin 2027, Shqipëria rrezikon të mos përfitojë asnjë shumë nëse nuk vepron më shpejt për të rikthyer besimin e institucioneve evropiane. Aktualisht, mes Komisionit dhe autoriteteve shqiptare po zhvillohet një procedurë dypalëshe, me synim vendosjen sa më të shpejtë të masave të duhura korrigjuese.
Paralelisht, çështja e abuzimeve me fondet e IPARD po hetohet edhe nga Prokuroria e Posaçme kundër Korrupsionit dhe Krimit të Organizuar.
