Shtetet e Bashkimit Evropian pritet të marrin 107 milion doza të vaksinave COVID-19 deri në fund të Marsit, tha të mërkurën një zëdhënëse e Komisionit të BE, duke arritur një objektiv të mëparshëm, por shumë poshtë planeve fillestare.
Sipas kontratave të nënshkruara me prodhuesit e ilaçeve, blloku kishte pritur të merrte 120 milion doza në fund të marsit vetëm nga firma anglo-suedeze AstraZeneca dhe dhjetëra miliona doza të tjera nga Pfizer-BioNTech dhe Moderna.
Por pas shkurtimeve të mëdha nga AstraZeneca, BE kishte rishikuar objektivin e saj deri në fund të Marsit në rreth 100 milion doza. Zëdhënësi i Komisionit tha në një konferencë shtypi se AstraZeneca pritej të jepte 29.8 milion doza deri të Mërkurën, në përputhje me qëllimin e saj të rishikuar.
Pfizer-BioNTech do të japë 67.5 milion doza dhe Moderna gati 10 milion, shifra që BE ka thënë se janë në përputhje me angazhimet e tyre fillestare. BE pret një rritje të madhe të dërgesave në tremujorin e dytë që thotë se do të jetë e mjaftueshme për të vaksinuar të paktën 70% të popullsisë së saj të rritur deri në korrik dhe për të përshpejtuar vaksinimin e saj të ngadaltë deri tani.
Ndërkohë kujtojmë se shumë vende pezulluan para pak kohêsh vaksinen AstraZeneca pas raporteve për mpiksje gjaku.
