Autoritetet kanë zhvilluar një aksion në zyrat e dy postave private Elite Post dhe Expres24, në kuadër të një hetimi për evazion fiskal dhe dyshime për shpërndarje mallrash të pa zhdoganuara. Pamjet nga kontrolli i policisë dhe prokurorisë së Tiranës janë publikuar nga WebLajm.com.
Burime nga hetimi bëjnë me dije se gjatë kontrolleve janë sekuestruar kompjuterë dhe dokumentacion në ambientet e të dyja subjekteve. Dyshimet paraprake lidhen me pranimin dhe shpërndarjen e mallrave pa kryer procedurat doganore dhe pa fatura tatimore.
Hetimi po ndiqet nga prokurori Ndini Tavani në bashkëpunim me sektorin e Krimit Ekonomik në Policinë e Tiranës. Lidhur me këtë çështje, Prokuroria pranë Gjykatës së Shkallës së Parë të Juridiksionit të Përgjithshëm Tiranë ka dhënë një njoftim zyrtar.
Sipas prokurorisë, është regjistruar procedimi penal nr. 156, i vitit 2026, për veprën penale të evazionit fiskal, të parashikuar nga neni 180 i Kodit Penal. Pas lejimit nga gjykata dhe me kërkesë të organit procedues, janë ushtruar kontrolle në disa subjekte që ofrojnë shërbime postare në kryeqytet.
Nga kontrollet e deritanishme janë sekuestruar sasi të konsiderueshme mallrash të marra në dorëzim pa fatura tatimore, shuma monetare në vlerën rreth 13 milionë lekë, si dhe dokumentacion shoqërues. Sipas prokurorisë, këto prova tregojnë paligjshmëri në drejtim të evazionit fiskal dhe dyshohet se shumat e parave rrjedhin nga aktivitet i kundërligjshëm.
Hetimet vijojnë për identifikimin e shitësve realë dhe dokumentimin e plotë të veprimtarisë së dyshuar të paligjshme.
View this post on Instagram
