Kreu i Partisë së Lirisë, Ilir Meta ka mbajtur fjalën e tij gjatë Asamblesë e të zgjedhurve vendorë, nga ku deklaroi se të gjitha bashkitë tentojnë që të bllokojnë llogaridhënien, sidomos sa i përket buxhetit të ri të vitit 2024.
Sipas Metës, fokusi kryesor i bashkive janë inceneratorët, ku u ndal më shumë tek bashkia Tiranë, që drejtohet nga Erion Veliaj.
Ai tha se inceneratori i Tiranës i është lejuar të marrë 15 Ha pa leje, që nuk mban askush përgjegjësi, ndërsa nga ana tjetër policia arreston qytetarët se pse kanë ndërtuar një dritare më shumë në banesat e tyre.
“Bashkitë, tentativë për të bllokuar llogaridhënien. Duhet të vijojmë konsultat publike për buxhetin. Buxheti për vitin 2024, fokusi i tyre janë inceneratorët. Do të fokusohemi te biznesi i vogël dhe i mesëm, të dhënia e përparësisë. E dimë se ka shumë familje që kanë ngelur jashtë për shkak të tërmetit. Këto janë çështje që do të vazhdojmë t’i ndjekim. Këshilltarët tanë përballen me arrogancë. Inceneratorit të Tiranës i lejohet që të marrë hektarë dhe të bëjë ndërtime, ndërsa qytetarët arrestohen për banesat e tyre. Inceneratori i Tiranës, që ka ndërtim pa leje 15 ha, ose sa 30 fusha të Air Albania, vazhdon punën. Duke falënderuar këshilltarët tanë që të intensifikojnë aktivitetin e tyre”, tha ish-presidenti ndër të tjera.
Kujtojmë se Partia e Lirisë edhe më parë ka reaguar për inceneratorin e Tiranës, duke zhvilluar një aksion simbolik para bashkisë dhe duke bërë përgjegjës Veliajn për vjedhjen e madhe për projektin e pastrimit dhe krijimin e një inceneratori fantazëm, për të cilin janë shpenzuar miliona euro nga buxheti i shtetit.
