Bashkim Jashari është emëruar si komandant të ri i Forcës së Sigurisë së Kosovës (FSK) nga presidentja e Kosovës, Vjosa Osmani.
Zyra e Presidencës ka thënë të martën, në një njoftim zyrtar për mediat, se emërimi i tij është bërë pas propozimit të ministrit të Mbrojtjes, Armend Mehaj dhe rekomandimit të kryeministrit të Kosovës, Albin Kurti.
Paraprakisht, Osmani ka liruar nga detyra komandantin e deritashëm, Rrahman Rama, për të cilin është deklaruar se ka dhënë dorëheqje nga ajo pozitë. Ndërkaq pas emërimit, në Ministrinë e Mbrojtjes është kryer procedura e pranim dhe dorëzimit të detyrës.
Bashkim Jashari, është nipi i komandantit legjendar Adem Jashari, përkatësisht është djali i Rifat Jasharit.
Kujtojmë që më herët, Bashkim Jashari ka qenë shef i Inspektoratit të FSK-së. Forca e Sigurisë së Kosovës është themeluar më 2009 në bazë të Planit të Ahtisaarit, dokument që ka rezultuar me pavarësi të Kosovës.
Kjo Forcë është ngritur nën mbikëqyrjen e NATO-s. Në dhjetor të vitit 2018, Kuvendi i Kosovës ka miratuar ndryshimet ligjore për të ndryshuar mandatin e FSK-së.
Përgjegjësitë e reja kanë të bëjnë me ruajtjen e sovranitetit dhe integritetit territorial, qytetarëve, pronave dhe interesave të Republikës së Kosovës, si dhe mbështetje ushtarake për autoritetet civile dhe pjesëmarrjen në operacionet ndërkombëtare.
