Protestat së fundmi janë duke pushtuar vendin, mirëpo mesa duket kjo sipas kreut të PD-së, Lulzim Basha nuk është një lëvizje për pushtet.
Nga studio e “Zonë e Lirë”, ai ka thënë se tani Ramës nuk është duke i funksionuar mekanizmi i frikës.
“Unë besoj tek forca e njerëzve. Unë besoj se shteti është si një familje e madhe, ka për detyrë të kujdeset për njerëzit, për mirëqenien e tyre, të kujdeset ndaj çdo qytetari edhe ndaj më të pamundurit.
Çfarë bën një familje? Një familje me kërkesë të lartë llogarie, çfarë bën? Kujdeset që brenda familjes, gjithkush të bëjë detyrat e veta dhe ne për këtë po luftojmë; të kemi një shtet ku gjithsecili të bëjë detyrat e veta dhe askush të mos ketë mundësinë të abuzojë me pasuritë publike dhe me fatin e njerëzve.
Ky shtet sot ka vetëm një qëllim: vjedhjen, abuzimin dhe në funksion të kësaj ka frikën dhe propagandën. Sa mund ta zgjasë kështu? Shqiptarët po bashkohen dhe po bashkohen me një qëllim: ti japin fund kësaj gjendjeje dhe të krijojnë, nëqoftëse krahasojmë shtetin me familjen, një shtet i cili të japë llogari para tyre, mos ti vjedhë, mos t’i dhunojë, mos ti tallë por të kujdeset për ta.
Shpresa për këtë ndryshim është shumë më e fortë se sa frika që po mundohet në grahmat e fundit të ngjallë ky regjim. Nuk po i funksionon më frika”, tha ndër të tjera Basha.
