Kreu i Partisë Demokratike, Lulzim Basha, gjatë një konference për mediat, ka folur edhe për partinë e re të sapokrijuar nga ish-deputetja e PD dhe ish-kryeparlamentarja Jozefina Topalli.
Ndër pyetjet e drejtuara nga gazetarët, Basha u përgjigj edhe në lidhje me komentimin e deklaratave të ish-kryeministrit Sali Berisha, i cili ishte shprehur më herët se Basha kishte gabuar në 2017, pasi nuk kishte futur në listat e kandidatëve për deputetë edhe Jozefina Topallin.
Kryedemokrati Basha ka vijuar sërish të shprehet se partia e krijuar nga Topalli, është “krijesë” e Ramës.
“Nuk ka asnjë parti të dalë nga Partia Demokratike, ka vetëm parti të krijuara nga Edi Rama. Por prapë është i pashpresë, madje kjo tregon se sa i pashpresë është”, është shprehur kreu i PD, Lulzim Basha.
Lëvizjen e re politike të ish-nënkryetares së PD-së, Basha e ka konsideruar edhe më herët si një përpjekje për të mbajtur në pushtet Edi Ramën.
Nga ana tjetër Topalli ka deklaruar se nuk do të rrijë të bëjë sehir, pasi situata në vend nuk është aspak e mirë.
Ajo është shprehur se sulmet e politikanëve të cilët luftojnë vetëm për të mbajtur pushtetin nuk e impresionojnë dhe se do të vazhdojë gjithmonë që të thotë të vërtetat e saj.
Partia e re e Jozefina Topallit do të quhet “Lëvizja për Ndryshim” dhe pritet që të prezantohet ditën e nesërme./GazetaReforma.com/
