Pas momenteve të dhunshme në protestë, ka reaguar dhe kreu i Partisë Demokratike, Lulzim Basha.
Në një intervistë nga bulevardi, Basha ka deklaruar se çarja e kordonit policor ka qenë një skenar i kryeministrit Rama për të nxitur dhunën.
“Ministri i Brendshëm e di fare mirë që kordoni i policisë ka hapur radhët për të krijuar një skenë të tillë. Siç e shikoni rrinë duarkryq sepse kanë një skenar për të nxitur dhe për të stimuluar dhunë. Ka nisur para katër ditësh me deklarata të papërgjegjshme të Policisë, ka vazhduar gjithë mbrëmjen e djeshme, ditën e sotme, gjatë kohës që kanë qarkulluar protestuesit. Dhe tani ndërkohë që protesta filloi plotësisht në mënyrë paqësore dhe s’kam asgjë me efektivët, se efektivët kanë marrë lule nga ne në fillim të protestës. Ndërkohë me presionin më të vogël të turmës, që natyrisht që janë të irrituar sepse janë banorë të Unazës së Re, kanë shkuar për t’u prishur shtëpitë për t’u vjedhur 18 milionë euro, papritur shohim që hapet kordoni policor. Kjo do të thotë që ka një plan për të nxitur dhunë. Ka një plan për të nxitur dhunën që t’i drejtojë gishtin e akuzës opozitës dhe kjo është e papranueshme.”-është shprehur Basha.
Sakaq, policia ka vijuar me hedhjen e gazit lotsjellës dhe ujë për të larguar personat që kanë pushtuar shkallët e godinës së kryeministrisë.
Disa protestues janë dërguar me autoambulanca drejt Spitalit të Traumës, për shkak se kanë humbur ndjenjat.
Burimi: Balkanweb
