Kryetari i Partisë Demokratike, Lulzim Basha është pritur ditën e sotme nga një numër i madh qytetarësh, në “Njësinë 3” në kryeqytet. Gjatë diskutimeve që pati, me banorët e zonës dhe bizneset e vogla, Basha u zotua se mbas 25 prillit do të ketë amnisti për të gjitha padrejtësitë që janë bërë ndaj tyre.
Kryedemokrati edhe ditën e sotme ka mbledhur një numër të madh qytetarësh , në kundërshti me rregullat e vendosura nga Komiteti Teknik i Ekspertëve.
Pjesë nga diskutimet:
Basha: Shqipëria mezi po e pret ndryshimin dhe familje si tuajat do të jenë të parat që do të përfitojnë.
Qytetarja: Inshalla me këmbë të mbarë, se na i shtoi 350 lekë, na i shtoi.
Basha: Tallje, se dhe unë të dy prindërit pensionistë i kam. Më 25 do t’i japim fund kësaj talljeje dhe do iu japim dinjitetit, që meritoni, për sakrificat me të cilat na keni rritur.
Qytetarja: Kam tre orë që mezi pres të vish. Më kanë vënë 120 milionë lekë gjobë, më kanë bërë me zemër e tension. E dëgjova atë që kishe thënë dhe të përgëzoj.
Basha: Do bëhet amnisti për gjithë këto padrejtësi për familjet dhe biznesin e vogël. Më 25 prill votoni për ndryshimin.
Qytetari: Ta heqim këtë maskara. Ta heqim.
