Basha mashtron publikun për vilën në kompleksin “Long Hill” në Lundër. Zyra e shtypit në PD kishte informuar se “Pas disa dëmeve të shkaktuara nga tërmeti, banesa e zotit Basha do të duhet t’i nënshtrohet disa punimeve të domosdoshme. Për këtë arsye zoti Basha dhe familja e tij janë zhvendosur përkohësisht në një banese me qira”.
Ndryshe qëndron realiteti sipas raportit teknik të Instituti i Ndërtimit për pallatin ku jetonte Lulzim Basha. Në raport konstatohet se pallati nuk ka pësuar asnjë dëmtim nga tërmeti, përjashtuar disa dëmtime elementare të bojës. Raporti është firmosur nga Agron Hysenlliu, Lindita Gjergji, Afrim Çenga, Gerti Çela Besjana Memoçi dhe Joana Kaçorri, por në ekip merrnin pjesë edhe disa specialistë të drejtorisë së Emergjencave Civile. Basha jetonte në katin e fundit të këtij pallati, që ekspertiza e nxjerr të paprekur nga tërmeti.
Lulzim Basha është zhvendosur në një vilë 2-katëshe në kompleksin luksoz me parkim, oborr dhe pishinë. Një vilë në këtë zonë jepet me qira për të paktën 2500 euro në muaj, ndërsa për të blerë një të tillë kushton rreth 410 mijë euro. Rezidentë në këtë zonë janë biznesmenë dhe diplomatë. Kryetari i PD-së ka deklaruar se jeton aty me qira.
/Gazeta Reforma/
