Kreu i PD, Lulzim Basha reagon për Opinionin paraprak të Komisionit të Venecias për ndryshimet në Kodin Zgjedhor. “Ky është një tjetër konfirmim i aktit anti-kushtetues dhe anti-demokratik të ndërmarrë nga kryeministri Edi Rama për zgjedhjet e 25 prillit”, tha Basha në një intervistë televizive.
Basha i qëndron rekomandimit të Komisionit të Venecias që çdokush të kandidojë në vetëm një zonë, dhe jo kryetarët e partive të kenë të drejtë të garojnë ngë 4 zona.
Lidhur me ndryshimin sipas të cilit, kryetarët e partive mund të kandidojnë në 4 zona, Lulzim Basha tha se “Unë mendoj se ky është një përcaktim tjetër i një taktike të ankthit dhe të panikut të Edi Ramës dhe vetë Venecia ka thënë që është anti-demokratike. Partia Demokratike dhe unë personalisht qëndrojmë me parimin dhe parimi në këtë rast është që çdokush do të kandidojë vetëm në një zonë”.
I pyetur se ku do të kandidojë Basha tha se “Për këtë dhe për çdo çështje tjetër ku vendimmarrja e Partisë Demokratike, si gjithmonë do të jetë e hapur dhe transparente. Do të keni në momentin e duhur përgjigje”.
