Pas reagimit të kryeministrit Rama për çështjen Veliaj-Tabaku ka reaguar sot edhe kryetari i Partisë Demokratike Lulzim Basha.
Me anë të një postimi në Twitter, Basha tha se e vetmja e vërtetë e kryeministrit është plaçkitja e shqiptarëve në interes të oligarkëve dhe banditëve të tij.
Basha tha se kjo është një e vërtetë që as gjyqtarët e korruptuae nuk mund ta fshehin.
“Babëzia, arroganca dhe shpifja janë trinomi i pandarë i RAMAVIRUSIT që prej 7 vitesh i ka shtyrë shqiptarët drejt shpunësimit, varfërisë dhe krizës. Asnjë marionetë e RAMAVIRUSIT nuk e fsheh dot hajdutërinë e tij në bashkëpunim me trafikantët e drogës tek afera e Astirit. E vërteta e vetme e këtij KM dhe bufonëve të tij është plaçkitja e shqiptarëve për interes të banditëve dhe oligarkëve të tij. Këtë të vërtetë që i madh e i vogël e di dhe e ka provuar në kurriz, nuk e fshehin dot më as gjyqtarët e korruptuar dhe as regjia e propagandës së lodhur. Këto të vërteta dhe bashkimi më i madh i shqiptarëve kundër mjerimit ekonomik dhe padrejtësive të RAMAVIRUSIT, do ta largojnë shumë shpejt këtë bandë dhe drejtësia e pavarur do t’u japë ndëshkimin e merituar me ligj për krimet, varfërimin dhe zhvatjen e shqiptarëve dhe Shqipërisë”, deklaron Basha.
Ndërkaq Gjykata e Tiranës, ditën e sotme ka vendosur të shpallë fajtore ish-deputeten e PD, Jorida Tabakun në lidhje me akuzat që ka ngritur ndaj kryetarit të Bashkisë së Tiranës, Erion Veliajt.
