Kreu i Partisë Demokratike, Lulzim Basha ka folur rreth programit që partia e tij ofron në zgjedhjet e 25 prillit. Në emisionin “Përballë” të gazetarit Lutfi Dervishi, Basha ka thënë se program është hartuar në bashkëpunim me 500 ekspertë dhe se ka pasur kohë mjaftueshëm për t’u kopjuar edhe nga kundërshtarët, që sipas Bashës është forma më e lartë e komplimentit.
Lideri i opozitës deklaroi se program i PD ka si synim mirëqenien e shqiptarëve dhe rritjen e vendeve të punës e gjithashtu pagave.
“Programi ynë është një program i cili është hartuar në bashkëpunim me mbi 500 ekspertë për një periudhë kohore prej më shumë se 2 vjetësh. Aspekte të veçanta siç është programi financiar madje kanë më shumë se 3-4 vjet që janë hartuar. Kanë kohë mjaftueshëm madje që edhe të kopjohen pa u kuptuar nga pala kundërshtare që është natyrisht forma më e lartë e komplimentit dhe e miklimit dhe e vlerësimit për programin tonë, por mbi të gjitha është një program i konsultuar me Aleancën për Ndryshim. Partia Demokratike vjen me një program propozimesh, planesh, të cilat janë të përllogaritura për të dhënë impaktin maksimal në synimin tonë, në objektivin tonë madhor që është mirëqenia e shqiptarëve, që është rritja e vendeve të punës, rritja e pagave dhe dalja nga cikli i krizës ekonomike 8-vjeçare ku e ka futur vendin keqqeverisja e Edi Ramës”, tha Basha.
