Barriera e Madhe Koralore është përkeqësuar në një masë të tillë që duhet të renditet si një vend i trashëgimisë botërore “në rrezik”, tha të martën një komitet i Kombeve të Bashkuara – duke shkaktuar reagime të menjëhershme nga qeveria Australiane.
Komiteti i Trashëgimisë Botërore të UNESCO-s rekomandoi listimin, duke njohur krizën e klimës si faktorin nxitës të shkatërrimit të barrierës më të madhe me korale në botë. Ai bëri thirrje që Australia të adresojë urgjentisht kërcënimet nga ndryshimi i klimës.
Përfshirja do të votohet në takimin e komitetit në Kinë muajin tjetër.
Ministrja Australiane e Mjedisit Sussan Ley tha se qeveria do të kundërshtojë fuqimisht rekomandimin, duke argumentuar se qeveria po investon 3 miliardë dollarë në mbrojtjen e barrierës. Ley tha se zyrtarët në Canberra ishin të shtangur nga masa dhe akuzoi UNESCO për kthim prapa të garancive të mëparshme se barriera nuk do të deklarohej e rrezikuar.
“Great Barrier Reef është barriera e menaxhuar më mirë në botë dhe ky draft rekomandim është bërë pa shqyrtuar gumë nga dora e parë, dhe pa informacionin e fundit,” tha Ley në një deklaratë.
Në një telefonatë me Drejtorin e Përgjithshëm të UNESCO-s Audrey Azoulay, Ley tha se ajo e bëri të qartë se Australia do e kundërshtojë këtë qasje të gabuar, pasi sipas tyre është marrë pa konsultime të përshtatshme.
E shtrirë në gati 345,000 kilometra katrorë dhe shtëpia e më shumë se 1500 llojeve të peshqve dhe 411 llojeve të koraleve të forta, barriera e Madhe Koralore është një ekosistem detar jetësor. Ajo gjithashtu kontribuon 4.8 miliardë dollarë në vit në ekonominë e Australisë dhe mbështet 64,000 vende pune, sipas fondacionit përkatës.
Por mbijetesa afatgjatë e barrierës ka ardhur në pikëpyetje. Ajo ka vuajtur nga tre ngjarje shkatërruese masive të zbardhjes që nga viti 2015, të shkaktuara nga temperaturat mbi mesatare të oqeanit ndërsa djegia e lëndëve djegëse fosile rritet në planet.
