Në mbledhjen e fundit të Konferencës së Kryetarëve, Partia Demokratike (PD) ka kërkuar që të organizohet një debat parlamentar për të diskutuar çështjen e trafikut të drogës. Gazment Bardhi, kreu i Grupit Parlamentar të PD-së, ka argumentuar se kjo çështje është ende aktuale dhe e pa zgjidhur. “Ju mund të jeni dakord që të mos ekzistoje opozita, por s’e keni në dorë ju. Kërkesa për mocion me debat, është e drejtë e opozitës,” tha Bardhi. Ai shtoi se, pavarësisht se është trajtuar në të kaluarën, “laboratori i Xibrakës nuk është çështje e ezauruar,” duke iu referuar një dosjeje të veçantë që sipas tij nuk është trajtuar siç duhet. Bardhi vuri në dukje gjithashtu raportet ndërkombëtare që flasin për rritje të problemit të trafikut të drogës.
Nga ana tjetër, Bledi Çuçi, kreu i Grupit Parlamentar të Partisë Socialiste, u shpreh kundër kësaj kërkese. Çuçi argumentoi se çështjet e ngritura nga opozita janë të ezauruara nga gjyqësori dhe nga debatet e mëparshme parlamentare dhe komisionet hetimore. “S’kemi si të vendosim sot një datë për mocionin, kur mendojmë se ky mocion s’duhet zhvilluar fare pasi janë çështje të stër-ezauruara,” tha Çuçi, duke shtuar se kërkesa për mocion është pa vend për shkak të trajtimit të mëparshëm ligjor dhe parlamentar të çështjeve.
