Aksioni i qeverisë për të shembur banesat tëk “5 Maji” në Tiranë në kuadër të projektit të “Unazës së Madhe” vazhdon pavarësisht rezistencës së banorëve.
Ditën e sotme në zonën e “5 majit” janë shembur disa banesa që do të preken nga procesi i rindërtimit.
Mes tensioneve, përplasjeve mes banorëve dhe forcave të IMT dhe policisë të gjitha këto ndërtesa u kthyen në disa rrënoja. Banorët panë me sytë e tyre se si puna dhe mundi i tyre u shua në vetëm pak minuta.
Fotot më poshtë demonstrojnë situatën në zonën e “5 Majit”
Në orët e para të mëngjesit ata u përballën me forcat e OSHEE të cilat mbërritën për të bërë ndërprerjen e energjisë elektrike. Më pas, në zonë u shtuan forcat e policisë. Këta të fundit rrethuan zonën e më pas nisën spastrimet brenda banesave, në mënyrë që brenda tyre të mos kishte asnjë qytetar. Shembjet u shoqëruan me gaz lotësjellës, shashka, hedhje gurësh nga efektivëve. Për pasojë tre janë banorët që u shoqëruan nga policia, në mesin e tyre edhe Laureta Nikolli.
Kujtojmë se prej disa kohësh banorët e “5 majit” por jo vetëm janë ngritur në protesta që kundërshtojnë shembjen e banesave të tyre.
Pas takimit para 2 javësh me kryeministrin Rama, nënë Liza, tashmë simbol i protestës së banorëve të “5 Majit” u shpreh: “Unë refuzoj ndihmën me taksat e popullit, unë e kam bërë shtëpinë vetë me djersën e djemve dhe vajza të mija dhe s’ka të drejtë të ma marri askush”.
Në fakt nënë Liza tha një të vërtet të hidhur, që kostoja e akomodimit dhe “qetësimit të gjakrave” të banorëve të “5 Majit” bie mbi taksapaguesit shqiptarë. Shpenzimet për qiranë, për projekte dhe rregullime i paguajmë ne nëpërmjet taksave ndërkohë që miqtë e Veliajt bëjnë “kërdinë” me shitjet e apartamenteve.
