Projekti i përbashkët i Bashkisë Durrës dhe Fondacionit Shqiptaro-Amerikan për Zhvillim (AADF) për rehabilitimin e parkut arkeologjik po përballet me kundërshtimin e fortë të banorëve lokalë, të cilëve u rrezikohen shtëpitë. Sipas vendimit të qeverisë, parashikohet prishja e 74 banesave në zonën arkeologjike të qytetit, me një fond shpronësimesh prej 315 milion lekësh.
Banorët pretendojnë se nuk janë përfshirë në asnjë fazë të konsultimit publik dhe se për vendimin e prishjeve kanë mësuar vetëm rastësisht. Ata denoncojnë se procesi i shpronësimit nuk reflekton vlerat reale të tregut për pronat e tyre dhe i konsiderojnë prishjet si selektive.
Edhe këtë të premte, ata kanë protestuar përpara godinës së Bashkisë Durrës. Banorët deklaruan se do të vijojnë dhe përshkallëzojnë protestat nëse nuk merren masa për të garantuar transparencë dhe kompensim të drejtë.
“Jemi të gatshëm të shkojmë deri në fund,” thanë disa prej protestuesve, duke theksuar se nuk janë kundër zhvillimit të qytetit, por kërkojnë që të respektohen të drejtat e tyre dhe të mos përjashtohen nga procesi vendimmarrës.
