Pas tre ditësh protesta në Rrjoll të Velipojës, banorët e zonës e kanë zhvendosur sot protestën në Tiranë, duke u mbledhur para SPAK. Ata kundërshtojnë ndërtimin e resortit turistik nga biznesmeni Bashkim Ulaj, me firmë të Belinda Ballukut, në kufi me fshatin Baks Rrjoll, pranë zonës së Ranës së Hedhun, duke e akuzuar se u ka grabitur pronat.
Rreth 60 familje kërkojnë ndalimin e punimeve si dhe rikthimin e pronave që thonë se u përkasin brez pas brezi.
Ata akuzojnë se toka ku po ndërtohet resorti është pronë e tyre që nga viti 1936 dhe se çështja ndodhet ende në proces gjyqësor. Pavarësisht kësaj, më 16 janar të këtij viti, leja e ndërtimit për projektin gjigant turistik me sipërfaqe rreth 1.46 milionë metra katrorë është firmosur nga Belinda Balluku, duke hapur rrugën për nisjen e punimeve dhe rikthimin e fadromave në terren.
Protestat në Velipojë janë shoqëruar me tensione të forta me Policinë, përplasje fizike dhe shoqërime në komisariat. Gjatë një prej përplasjeve, një i moshuar protestues ka rënë pa ndjenja në tokë, ndërsa pamjet nga terreni treguan se ndihma e parë nuk u dha menjëherë. Banorët denoncojnë gjithashtu se punimet kanë nisur pa tabelë informuese dhe, sipas tyre, edhe gjatë natës, pa asnjë njoftim për komunitetin.
Kjo është hera e dytë që banorët paraqiten në SPAK. Më 25 mars të vitit të kaluar, ata kanë depozituar një kallëzim penal ndaj firmës ndërtuese dhe personave që dyshohet se kanë falsifikuar dokumente pronësie në zonën e Baks Rrjollit, duke kërkuar hetim të plotë për mënyrën se si janë dhënë lejet dhe si është tjetërsuar prona.
Projekti parashikon ndërtimin e një fshati turistik me vila dhe hotele luksoze në një sipërfaqe prej rreth 147.2 hektarësh. Më 31 dhjetor 2024, Bashkim Ulaj, së bashku me vëllezërit e tij Astrit dhe Ahmet Ulaj, morën statusin e veçantë “investitor në strukturë akomoduese me 5 yje, status special” për resortin turistik “Blue Borgo” në bregdetin e Velipojës. Banorët shprehen se SPAK është i vetmi institucion ku kanë mbetur të besojnë dhe paralajmërojnë se protestat do të vijojnë deri në zgjidhjen e çështjes.
