Banorët e Bërxullës janë ngritur sërish në protestë këtë të enjte për të kundërshtuar projektin Thumanë-Kashar.Prej 6 muajsh tashmë këta banorë i bëjnë thirrje qeverisë, por thirrjet e tyre bien në vesh të shurdhët pasi asnjë masë nuk është marrë. Një protestuese me lot në sy tha për mediat se nuk do ta lëshojë tokën nëse nuk merr zgjidhjen që kërkon.
“Qeveri më të poshtër nuk kam parë. Duhet një roman për të shkruar për Edi Ramën. Jo vetëm për ne fshatarët, por për gjithë Shqipërinë. Ky duhet të jetë kryeministri më i keq jo i Shqipërisë, por i botës, më hajdut bashkë me qeveritarët e tij. Hajdut me gjithë ministren Balluku. Prandaj e çon atë Dallëndyshen. Pasha Zotin, e vdekur nuk kam për ta lëshuar tokën time, deri sa të marrim atë që kërkojmë. Nuk e lëshoj rrugën time”, deklaroi banorja.
Ndërkohë një tjetër protestuese deklaroi se projekti do të ndajë fshatin në 2 pjesë.
“Po protestojmë çdo ditë. Dje ishim përpara Hipotekës për të kërkuar legalizimin e banesave dhe certifikatat e pronave të tona. Atje është han, nuk u shërbejnë qytetarëve. Qëndrojnë në zyra sa për të bërë sehir. Shërbim për popullin nuk ka. Në rast se nuk ke mbi 5 mijë euro nuk zgjidh punë. Ku t’i gjej unë 5 mijë euro. Është e pabesueshme, ne protestojmë prej 6 muajsh, nuk kemi asnjë përgjigje nga shteti. Fshati ndahet përgjysmë sipas projektit dhe gjysma e fshatit nuk komunikon me gjysmën tjetër, as shkollën, as qendrën shëndetësore. Nuk lidhen dot, është një masakër. Nuk i hamë shantazhet e tyre”, tha një banore tjetër.
